Return to site

تجربتي مع "الروتين اليومي" وازاي سهل لي حياتي

"أفضل ٥ عادات بعملها كل يوم الصبح "

كلنا عارفين أهمية الروتين في حياة الأطفال وفيه مقالات كثيرة ومفيدة جدا عن الموضوع ده! لكن انهاردة أنا عايزة أتكلم عن أهمية الروتين في حياتي أنا، مش بس كأم لكن كبني آدم طبيعي له الحق إنه يكون عنده عادات بيحب يعملها بعيد عن مسؤولية البيت والأولاد

قبل ما أدرك أهمية إني لازم "أراعي نفسي الأول عشان أقدر أراعي أولادي" كان الصبح ده بالنسبالي "كبوس" وكنت بقوم شايلة هم الدنيا والمسؤوليات اللي ورايا للبيت والولاد "الله يحفظهم" كنت بتعامل إني إنسان آلي ، مكينة مستهلكة في خدمة البيت والولاد من أول مفتح عيني لحد منام

كنت حافظة! مش فاهمة ولا حاسة بأي حاجه غير إني عايزة اليوم يعدي وأخلص من مسؤولية يوم عشان أدخل في يوم بعده وهكذا! على أمل إن لما الاولاد تكبر هفوق

بس اللي عرفتوا وفهمتوا من خبرة أصدقاء أولادهم أكبر في السن من عمر أولادي إن محدش بيفوق تماما لكن المسؤوليات بس هي اللي بتتغير وحجمها بيختلف 

 عشان كدة كان لازم الاقي وقت لنفسي عشان اقدر اواصل يومي من غير ما احس اني مستهلكه بالشكل ده

(لو عايزين تعرفوا أكتر عن قصتي اضغطوا هنا)

ودلوقتي هشاركوا ٥ حاجات بهتم أعملها كل يوم الصبح عشان أظبط بها يومي وأقدر أكمل مع الأولاد وأنا جاهزة وحاسة إني بني آدم طبيعي

١) صلاة الفجر

١) صلاة الفجر في وقتها من الحاجات اللي بتظبط بقيت يومي جدا. في أغلب الأحيان الولاد بيبقوا لسة نايمين فالصلاة بقدر أركز فيها أكتر من أي فرض تاني،ده غير طبعا احساسي بالإطمأنان حيث روى الإمام مسلم عن جندب بن سفيان رضِي الله عنْه أنَّ رسول الله صلَّى الله عليه وسلَّم قال : "مَن صلَّى صلاة الصبح فهو في ذمَّة الله"

٢) تهوية المنزل

٢) ثاني حاجه لاحظت إنها مهمة بالنسبة ليا جدا أول ما أصحى هي إني أفتح كل ستائر البيت ، الدنيا لما بتكون منورة ده مهم جدا عندي وبيشرح قلبي.وبهتم كمان إني أفتح على الأقل شباكين في الشقه عشان أجدد الهوا اللي موجود فيها,مع كمان إني أشغل فواحة أو أي بخور. جربت قريب فواحة من نفرتاري وحبيتها جدا، عندهم روائح مختلفه كتير و من أكثر اللي عجبوني هي ال

Green Apple.

(عندهم كمان خدمة تسوق اونلاين ودي مناسبة جدا ليا لان نزولي قليل ووقتي ضيقNefertari)

٣) العناية بالبشرة

٣) لو محظوظة والولاد مزاجها رايق بدخل الحمام من غير الجماهير متستناني على بابه :) دايما بحط كل المنتجات اللي بستعملها كغسول،تونر، كريم إلخ . في باسكت جوا الحمام لأن لما بتجيلي الفرصة إني أدخل الحمام لوحدي دي مبتتكررش تاني

٤) الفطار

٤) بهتم جدا إني أحضر لنفسي فطار ولو بسيط وعشان أعمل ده براحتي دايما بتأكد إن الولاد فطروا وغيروا ومش محتاجين حاجه. لاحظت إني لما بخلص واجباتي مع الأولاد الأول قبل مفطر ده بيقلل إحساس الزمب اتجاهم لأني ببقى عارفه إنهم مش محتاجين حاجه فبالتالي لما أقول "لأ ده وقت ماما" إحساس الزمب مش بيبأه عالي. وأنا الاحساس ده هو المحرك الدائم في علاقتي بأولادي. بشتغل على إني أظبطه الفترة دي ومتحمسة أحضر كورس سمعت عنه في الموضوع ده. هشاركوا تفاصيل أكتر لما اتأكد منه

٥) الرياضة

٥) الرياضة من الحاجات اللي دخلتها قريب في روتيني واللي فعلا فرقت معايا. معنديش اشتراك شهري في چيم لكن بروح لما ظروفي بتسمح إن حد يقعد بالأولاد وده ممكن يحصل مره أو مرتين في الاسبوع وبالنسبة ليا كافيين إنهم يظبطولي مش بس بقيت اليوم لكن الاسبوع كله. حاليا بروح چيم

 Her's Gym 

اللي في التجمع الأول. عندهم سياسة

walk in payment

وبهتم أروح أحضر

aerobics classes

لأنها أمتع بكتير من الأجهزة. من أفضل ال

classes

اللي بحضرها هناك هي

Body step ,Zumba,Toning.

بقيت الاسبوع لما بتجيلي فرصة في البيت بشغل على ال

youtube

تمارين وبختار

Ab exercises

واليوجا. الرياضه بتحسنلي مزاجي عموما ولاحظت كمان إنها بتديني فرصة أركز في نظام أكلي ، زي إني أزود شرب المياه وأحاول أعمل أفضل اختيارات لاكل صحي أكتر

All Posts
×

Almost done…

We just sent you an email. Please click the link in the email to confirm your subscription!

OKSubscriptions powered by Strikingly