Return to site

"خطوات بسيطة لصباح أكثر سلام مع أولادك"

موضوع النهاردة هتكلم فيه عن خطوات بحرص إني أعملها كل يوم سبت قبل بداية الأسبوع الدراسي للأولاد. الخطوات دي بتسهل عليا تنظيم الأسبوع أكثر وبتوفرلي وقت ومجهود جسدي وذهني.

الخطوات وببساطة كالآتي :

١) بتأكد إن ملابس المدرسة نظيفة وجاهزة لأسبوع كامل. بمعنى إن بعدد أيام الأسبوع بيكون في طقم كامل جاهز لكل يوم. حتى الشرابات جاهزة ونظيفه بعدد أيام الأسبوع. ده بيسهل عليا إني مش بحتاج كل يوم أغسل أو أكوي وبالتالي بيوفر عليا المجهود الجسدي والذهني بتاع كل يوم قبل النوم أو خناقة الصباح بتاعة فين تيشيرت الألعاب والشورت اللي متغسلش وهكذا

٢) بتأكد إن طلبات اللانش بوكس الأساسية موجودة، زي مثلا العيش بتاع السندويتش أو أي حشو مهم ولادك متعودين عليه. بتأكد فقط من الأساسي وممكن أول الأسبوع أنزل أجيب باقي الرفائع. خطوة مهمة بعملها كل مساء على مدار الأسبوع هي إني بجهز كل حاجه وأي حاجه ممكن تجهز في اللانش بوكس من بالليل. بداية من زجاجة المياة اللي بملاها وأحفظها في الثلاجة لتقطيع الفاكهه والخضار لأي حاجة ممكن تحضيرها.التفاصيل دي تبان بسيطة وممكن ننجزها الصبح لكن في الحقيقة بتوفرلي وقت جامد وبتخليني أصحى وأنا بالي مرتاح أكثر.  

٣) تحضير أدوات المدرسة والشنطة. الخطوة دي لو أولادك كبروا أنصحك تمرينهم عليها. زي مثلا إنهم يركزوا إن المقلمة جاهزة أو لو عندهم مادة مينسوش الكتاب بتاعها وهكذا. ومتقلقيش خليهم يجربوا عواقب إنهم ينسوا عشان يتعلموا أهمية المسؤولية دي. لو أولادك أصغر بتحتاجي إنك تعملي التفاصيل دي، زي إنك تحطي ال

Channel Book

أو أي

File/Folder

مطلوب إعادته للمدرسة. خطوة مهمة كمان على الخطوة دي إنك من بالليل لو محتاجه تبعتي حاجة للمدرسة يا إما تكتبيها وتحضريها أو إنك تبعتي بها إيميل علطول، بلاش تستني الصبح إنك تمضي ورقة أو تبعتي فلوس رحلة المدرسة ...إلخ

الخطوات دي بسيطة جدا بس بتوفرلي وقت كبير الصبح إني أصحى براحتي من غير مقفل المنبه وأنط من السرير على كل التفاصيل دي. بالعكس بيكون عندي فرصة أصلي الفجر براحتي وذهني حاضر مش مشغول باللنش بوكس، أو بإبني الصغير اللي لو صحي هيكون عايز يتشال وكل الكلام ده اللي كل أم عارفاه

:)

جربوا الخطوات دي وقولولي لو عندكوا نصائح تانية عشان أجربها أنا كمان ونفيد بعض بحيث نقدر فعلا وسط زحمة الْيَوْمَ وتفاصيله الكثير إننا نوفر لنفسنا شوية دقائق نعمل فيهم الحاجة اللي بنحبها

:)

“Never take motherhood as an excuse for not living In-Style.”

- Israa Amer

All Posts
×

Almost done…

We just sent you an email. Please click the link in the email to confirm your subscription!

OKSubscriptions powered by Strikingly