Return to site

رمضانك إن ستايل

"أفكار بتظبط يومي الرمضاني"

من وأنا في بيت أبويا، وشهر رمضان ده له طعم تاني خالص 😍 لسة فكره تفاصيله، وشايفاني أنا وعيلتي واحنا بنتسحر، وشمه ريحة أكل أمي على الفطار 💚

من أهم أهداف الشهر ده هو إني أحسس أولادي وأعيشهم نفس الذكريات الجميلة اللي عيشتها في الفترة دي وأنا في بيت أبويا وأمي ووسط إخواتي..

"والهدف ده عمره ما ممكن يتحقق لو أنا مش مركزه مع نفسي واحتياجاتها"..

هدفي من المقالة دي هو الموازنة بين احتياجات جسمي، وروحي ، وقلبي وعقلي في خلال الْيَوْمَ وكل يوم. وهو ده اللي عايزة أشاركوا به في شوية أفكار برتب بها يومي في رمضان ✨🌙

بحب ابدأ يومي بدري، بحس ببركة في الْيَوْمَ لما أصحى بدري وبنجز حاجات أكتر بكتير. ببدأ يومي مع كراسة بكتب فيها أولويات كل يوم، وده بيغذي عندي احتياجات عقلي وبيساعدني يكون يومي منظم أكتر.🤓

ببدأ بترتيب البيت وخصوصا سريري، في علاقه عجيبة بين ترتيب سريري وبداية الْيَوْم. عقلي مش بيستوعب إن الْيَوْمَ بدأ طول ما سريري لسة مش متساوي😄 بستغل الفترة دي في الاستغفار أو الذكر عموما اللي بغذي به احتياجي الروحاني.

ببدأ علطول بالمطبخ وبحاول أنجز معظم المهام وولادي صاحيين عشان لما ياخدوا الناب بتاعتهم يكون ده الوقت بتاعي اللي أقدر فيه أعمل الحاجات اللي بحبها. في الفترة دي وأنا في المطبخ ممكن أحط ماسك على شعري وبكدة أكون غذيت قلبي وجسمي بحاجة بحب أعملها وهي إني أهتم بنفسي، ده غير طبعا إن ممكن كمان ده يكون وقت مناسب إني أسمع برنامج ديني أغذي به روحي وعقلي كمان ✨

بعد الفترة دي بيكون غالبا الوقت بتاعي اللي بقدر فيه أشتغل على شغفي ،سواء إني أكتب بوست زي ده أو أقرا حاجه في مجال شغفي، وطبعا ده جزء مهم عندي جدا بغذي به الجوانب الأربعة 😃 وأنصح كل أم تدور على الحاجه اللي بتحب تعملها مهما كانت بسيطة، لكن مهم يوميا تمارسيها ولو لنص ساعة عشان تحسي إنك عايشه.♥️

تحضير الفطار ده بيكون وقت العيلة، وده فيه بحاول إن كل واحد من ولادي على حسب سنه إنه يساعد فيه، من باب المشاركة والذكريات اللي عايزة أزرعها فيهم وده طبعا بيغذي كمان الجوانب الأربعة عندي👩‍👧‍👦

بعد الإفطار بحرص على صلاة التراويح، والمفتاح هنا إني أصليها بعد العشاء علطول ، وبصلي بالمصحف وده بيساعدني إني أختم المصحف مع نهاية رمضان وطبعا بيغذي الجانب الروحاني عندي.🧕🏼

من غير النوم بدري، مش بقدر أكون حاضرة وأنا بعمل كل الحاجات دي! النوم بدري بقى من أولوياتي من ساعة ما بقيت أم :)💆🏻‍♀️

كل سنة وإنتم طيبين ✨🌙

All Posts
×

Almost done…

We just sent you an email. Please click the link in the email to confirm your subscription!

OKSubscriptions powered by Strikingly