Return to site

روتين الصباح وأهميته في حياتك كأم

حددي عادات صحية تبدأي بها يومك،واشعري بالفرق الإيجابي في

 

اُسلوب حياتك

 

الروتين مهم جدا في حياة كل شخص، وفي رأيي أهميته بتزيد أكثر في حياة كل أم! لفت نظري إن معظم المقالات اللي مكتوبة عن أهمية وجود روتين يومي في حياة كل أم ،بتتكلم عن جانب واحد فقط وهو خاص بترتيب المنزل وطلبات البيت وكيفية توفيق وقتك عشان تقدري تحققي كل ده!

أنا في الحقيقة وفي المقالة هنا عايزة أركز على أهمية اتباع روتين "صباحي يومي" مش للبيت وطلباته! ولكن روتين بيخدم طلباتك إنتي كإنسانة لها الحق إنها تغذي روحها وجسدها المسؤول عن بيت وأسرة ومهام كثيرة! لأن ببساطة لازم تراعي وتهتمي بنفسك أولا عشان تقدري تهتمي بأولادك وتراعي طلبات بيتك!

قررت أكتب المقالة دي بعد ما لاحظت الفرق في يومي وفي مزاجي بشكل عام لما بحرص على إني أبدأ يومي بخطوات وعادات بسيطة لكن إيجابية وصحية! اليوم بيكون في بركة أكثر ، بركة في الوقت و بركة في الصحة و في الجهد المبذول وفي رؤيتي وتقبلي لكل يوم جديد!

ازاي تقدري تحددي العادات اللي محتاجاها؟ عن طريق الإجابة على الأسئلة التالية :

  1. ما هو أبسط فعل أو عادة أقدر أعملها في اللحظة الحالية؟ "فعل بسيط يقربني خطوة ولو صغيرة نحو أهدافي على المستوى الروحاني والجسدي! أهداف على المستوى الجسدي زي (الرياضة،الأكل الصحي،العناية بالبشرة إلخ..) وكمان على المستوى الروحاني زي (علاقتي بربنا، علاقتي بأهلي وأصدقائي إلخ..)
  2. هل الفعل/العادة دي أقدر أعملها كل يوم ولمدة شهر كامل؟ "سر استمرارية العادات السليمة بيكون في قوة الايمان بأهمية العادة الجديدة والعائد الإيجابي منها وتأثيره على حياتنا! حياتنا فيها تفاصيل ومسؤوليات كثيرة، لازم تقدري تحددي العادات اللي بالتأكيد هتقدري تواظبي عليها مهما كانت بسيطة"
  3. ما هي احتياجاتي في هذه المرحلة من حياتي؟ وده بيكون عن طريق تحديد حالتك "الحالية" كأم! سواء بترضع فبالتالي محتاجة عادات صحية سليمة ومحددة تساعدك في المرحلة دي، أو مثلا أم لأكثر من طفل محتاجة أشتغل على لياقتي البدنية أكثر وهكذا... 

ودلوقتي وسريعا من غير ما آخذ من وقتكوا كثير، هشاركوا أهم ٥ عادات بحرس أعملها في كل يوم بستيقظ فيه بنعمة وفضل من الله :)

  1. صلاة الفجر! "بعتبرها رزق من ربنا سبحانه وتعالى ليا! بطمأن لما ابدأ يومي بها لأني بكون في ذمة الله باقي الْيَوْم"
  2. أذكار الصباح! "لو محظوظة وعندي جهد أقعد بعد الفجر أقولها بيكون خير وفضل من الله، لو مقدرتش برده بحرس إني أقولها أو ما أصحى" ودلوقتي فيه Apps كثيرة وجميلة جدا والمفضل ليا هو “Athkar”
  3. شرب ٢ كوب من الماء على الريق! "بحاول أغير في طعم المياه عشان مملش، أوقات أعصر عليها برتقالة، وأوقات ليمون، وأوقات تانية زنجبيل طازج مع ليمون ومعلقة عسل، على حسب المتاح المهم أروي جسدي بعد فترة النوم وطبعا كلنا عارفين أهمية المياة لجسمنا!
  4. ،روتين العناية بالبشرة! "وده عملت عنه فيديو بسيط هتلقوه لو مهتمين تعرفوه على صفحتي على الفيسبوك"بتكلم فيه عن خطوات ومنتجات بستعملها كل يوم وشوية نصائح عن الموضوع ده :)
  5.  أحضر لنفسي وجبة الفطار وعلى رواق! مهما كان الفطار بسيط بحاول يكون صحي وشكله يفتح النفس. ومكنش بجري ورا نفسي عشان بسرعة آكله و ألحق اللي ورايا! اللي وراكي عمره ما بيخلص، خدي وقتك تهتمي بنفسك عشان تقدري تعملي اللي وراكي بنفس راضية وطويلة بال.

!روتيني الشخصي بسيط جدا وبيتغير بين فترة والتانية على حسب أولوياتي واحتياجاتي في الفترة اللي أنا عايشاها

وزي أي حاجة عشان تنجح بتحتاج تحضير عملي وذهني، يعني عشان أشرب كوباية الزنجبيل الصبح بحضرها من بالليل،بحيث أنقع الزنجبيل الطازج في شوية مياة ساخنة طول الليل والصبح فقط بزيد عليه مياه دافئ مع الليمون ومعلقة العسل. وعشان أقوم أصلي الفجر لازم بنام بدري، وهكذا ، مهما كان التحضير بسيط متهملهوش لأن ده اللي بيهيأك نفسيا ويساعدك على الاستمرار.

!المهم في أي روتين هو إحساسك إنك بتاخدي وقتك وراحتك تعتني بنفسك وده بيكون ساعتها الدافع إن الواحد يهتم كمان باللي حواليه

.شاركوني إنتوا كمان أهم العادات الصباحية اللي بتهتموا تواظبوا عليها وبتساعدكوا في يومكم تكونوا أكثر إيجابية وتفاعل

All Posts
×

Almost done…

We just sent you an email. Please click the link in the email to confirm your subscription!

OKSubscriptions powered by Strikingly