Return to site

My “Updated” Back to school routine!

2019-2020 

روتين جديد لتسهيل العودة للمدارس

 

كل سنة وانتوا طيبين :)

سنة دراسية جديدة عايزه اشاركوا فيها الروتين اللي اتعودت مع الوقت إني أطبقه مع بداية كل سنة دراسية واللي الهدف الأساسي منه هو تسهيل أيام الدراسة علينا وعلى أولادنا

 

هبدأ ومن غير ما أطول عليكوا بأول خطوه اتعودت أعملها وبعتبرها "سر" نجاح أي مرحلة محتاجه تطبيق

وهي التفكير والتنظيم من بدري ، يعني لو مثلا عندي خطط لليوم ببدأ التخطيط لها اليوم اللي قبله وهكذا نفس الوضع مع المدرسة ببدأ مع نهاية العام الدراسي

مثال عملي للفكرة دي هو إني مع نهاية السنة الدراسية وقبل الأجازه

" وتفريغ الدماغ من الواجبات اللي ورانا كأمهات في وقت المدرسة"

هو إني بعيد ترتيب وتنظيم كل حاجه مش محتاجينها سواء أوراق امتحانات ، لبس مدرسة مستهلك خلاص مينفعش يتلبس تاني وهكذا

وبكده بكون متأكدة لما نرجع من الأجازه إن اللي موجود هو فقط الحاجات اللي هتستعمل ومفيش أي حاجه زيادة ممكن تعمل فوضى

من الخطوات المهمة كمان :

تخصيص مكان محدد لكل تفاصيل المرحلة دي، يعني مثلا

 

تحديد المكان اللي ابنك/بنتك هتعمل فيه الواجب كل يوم، وده عشان نتفادى الجدال بتاع

"اكتب على الترابيزة عشان خطك يطلع حلو"

تقدري لو عندك مساحة في أوضة الأولاد تخصصي ديسك للدراسة مهما كان بسيط المهم يكونوا مستوعبين فكرة إن هو ده مكان المذاكرة اللي هيكون فيه أدواتهم وكل تفاصيل المذاكرة

كمان تحديد مكان للبس المدرسة

ده بيسهل عليهم يعتمدوا على نفسهم أكثر. لاحظت إنه سهل عليهم يجهزوا الصبح بدري مع تقسيم اللبس على حسب أيام الأسبوع ، بجمع اللبس بحيث يسحبوه اليوم بيومه،

أنا دايما بفصل اللبس في مكان قريب وسهل لهم انهم يوصلوا له

"خصوصا لو أطفالك لسه صغيرين"

وكمان ده بيوفر عليا وقت إني مكنش كل يوم محتاجه أغسل عشان اللبس مش جاهز

كمان بكون مجهزة معاه الشراب تسهيلا لأي مفاجآت الصبح

:))

طبعا في أيام بتعدي بسلام وأيام تانيه بنتخانق على لون الشراب اللي مش عاجب ابني،

فالأحسن توحيد اللون أو يختاروا التفاصيل دي معاكي عشان نقلل من الحجج اللي بيطلعوا بيها كل يوم الصبح عشان مينزلوش المدرسة

:))

تفاصيل تانية بحب أخصص لها مكان، زي الشنطة بتاعة المدرسة، اللانش بوكس والزمزمية

"زي ما كنا بنسميها على أيامنا"

:))

 

ومع الوقت موضوع تحديد الأماكن ده بيخليهم

"وده مش بتوقعه في أول الدراسة "

إنهم يرجعوا يحطوا حاجاتهم في مكانها ، وطبعا لازم نشجعهم ونصبر شوية خصوصا في الأول لحد ما يرجعوا يتعودوا تاني على الروتين.

٢) تحضير وشراء ال

“SUPPLY LIST”

ودي بتكون قائمة بتطلبها المدرسة مع بداية كل عام دراسي

أنا شخصيا بفضل أشتريها بعد دخول الولاد المدرسة لسببين ، الأول إن المكتبة بتكون زحمة جدا مع دخول المدارس وثانياً أوقات الطلبات بتتغير عن المطلوب فالأفضل إني انتظر لكن مش أكثر من أول أسبوع عشان مكنش أخرت الطلبات كتير

في خطوة عملية كمان في الموضوع ده لكن لسه الحقيقي مجربتهاش شخصيا، وهي شراء الليست دي أونلاين وده طبعا بيوفر وقت ومجهود كبير.

من ضمن طلبات المدرسة هو لبس المدرسة والشنطة والشوز.

بكون محضره قائمة بأسماء الأولاد بعدد القطع المطلوبة لكل واحد وده يرجعنا لأول نقطه أتكلمت فيها وهي مع نهاية السنة اللي فاتت بكون وزعت القطع المستهلكة وكتبت القطع اللي هحتاج لها

بحدد في ورقه الأولاد كل واحد محتاج كام قطعه وايه هي القطع

 وبكده بوفر وقت ومجهود في أول السنه إني أرجع أفرز كل القطع تاني

 

وبيكون فقط المطلوب إني آخد الورقة دي وأطلبها من ال

Uniform shop

مش شرط كل سنة أشتري شوز أو شنطة جديدة، وده برضو بيتحدد في آخر السنة لو أساسي أو لأ، لكن بتأكد من إني غسلت الشنطة والشوز كويس جدا

نصيحة لما تشتروا القطع دي اختاروا ماركات كويسة، لأنها بتعيش فعلا معاكوا وبتستحمل الغسيل خلال السنة.

أنا اختياري المفضل لشنط المدرسة من

Kipling

هي وشنطة اللانش بوكس، عن تجربة بتستحمل البهدلة وبتتغسل ترجع جديدة ومش بتحتاج تتغير كل سنة ولا حتى سنتين

ممكن لكسر الملل بس من سنة للتانية الأولاد يختاروا لها اكسسوار جديد، زي

NAME TAGS

ده بيخليهم يحسوا بتغيير بدون ما نكون اشترينا جديد بدون داعي

٣) تحضير اللانش بوكس

الموضوع ده لوحده عايز مقالة لوحدها

:))

لكن خلوني سريعا أقولكوا ايه اللي بعمله وبيفرق في توفير وقت ومجهود معايا 

أولا لازم التحضير المسبق زي ما أتفقنا الخطوة دي سر النجاح في موضوع تنظيم الوقت

في بداية كل أسبوع واللي بيكون يوم السبت بتأكد من وجود أساسيات اللانش بوكس واللي عادتا بيكون مقسم بين بروتين وخضار وفاكهة 

وقبل الخطوة دي بكون قعدت مع الأولاد وفهمت منهم بيحبوا ايه في الخضار والفاكهة عشان أحط اللي بيحبوه وأحاول أداري اللي مش بيحبوه في وصفات تانية

وببدأ في تحضير أي خطوة ممكن تنجز قبلها بيوم،

زي إني أملى إزازة المياه بتاعت كل واحد واحفظها في الثلاجة ، أو إني أحشي السندويتش وأسيبه على التسخين الصبح،

وكمان أقطع أي خضار أو فاكهه ممكن يتحضروا قبلها بيوم، لو في أنواع الأفضل تتقطع في ساعة النزول للمدرسة يبقى بتأكد على الأقل إنها مغسولة وجاهزه على التقطيع

تفاصيل تبان بسيطة لكن بتفرق فرق رهييييب صدقوني

 

لو فرضنا في يوم معندكيش طاقه لأي تحضيرات، يبقى على الأقل أنام وأنا كاتبه ورقه بمكونات كل لانش بوكس

آخر حاجه هبقى عايزة أعملها هي إني أصحى الصبح لسه افكر هحضر ايه في اللانش بوكس

هتلاقوا نفسكوا واقفين نفس وقفة دولاب الهدوم مش عارفين تلبسوا ايه

:))

وطبعا من أهم التحضيرات هو إنك تكتبي أسامي الأولاد على اللانش بوكس وأي متعلقات لهم، عشان لو ضاع يقدروا يلاقوا الحاجه بتاعتهم بسهوله، أنا بعمل كدة كمان في لبس المدرسة

الواجب

 

من أثقل الطلبات اللي بتكون مطلوبة منهم ومتوقعة منا كأولياء أمور.

أنا في الحقيقة وبمنتهى الأمانة بتفادى الفقرة دي في اليوم بأي طريقه

لسبب ما فعلا مش بحبها

وبطلب من الأولاد يعتمدوا على نفسهم فيها ، طبعا أوقات لازم بتدخل لكن مش بحاول ابدأ آخد الدور ده،

وبحاول يتعودوا انهم لو في حاجه مش فاهمينها يطلبوها من المدرس أو المدرسة لأن أكيد هما أفضل مني في توصيل المعلومة

طبعا بتدخل عند اللزوم، زي مراجعة الامتحانات أو في قراءة حاجه أو شرح حاجه بسيطه لكن عمري ما بجاوب على الواجب

ونقطة أهم إن يكون بينك وبين الأولاد اتفاق على ميعاد الواجب ولو احتاج الأمر انك تساعديهم بمنبه يتفكروا به وقت الواجب.

أيا كانت القواعد اللي هتحطيها المهم يختاروها معاكي وهما مقتنعين ويلتزموا بها وتلتزمي بعواقب كسر القواعد دي، وفي الأغلب المدرسة هي اللي بتهتم بالعواقب دي وبالتالي مع الوقت الأولاد بيتعودوا يعملوا الواجب في ميعاده

وأخيرا مفيش أهم من إن يكون في تعاون بينك وبين الأولاد عشان تحققي التوازن اللي محتاجه له في بيتك

طبعا مش كل الأيام وردية وسهله معانا، وفي أيام بنكون مضغوطين فيها وبمقدرش أحقق التوازن ده، لكن بعمل اللي عليا

يعني خلي بينك وبينهم في بداية العام الدراسي زي اتفاق على نقط معينة ، مثلا بالنسبة ليا في اتفاق معاهم كالآتي :

١) أول ما نرجع من المدرسة وبعد السلامات

:))

كل واحد مطلوب منه يحط اللانش باج بتاعته في المطبخ ويرجع الشنطة مكانها، في أيام ده بيحصل وأيام طبعا مش بيحصل وبالتالي العواقب بتكون عن اتفاق واحد من اثنين

الأول اللي هو تاني يوم مش هيلاقي اللانش باج وهيحتاج يروح بكيس في ساندويتش واكيد دي مش حاجه هيحبوها وسط أصحابهم

الثاني هو إني هوديه المطبخ لكن ده هياخد مني وقت ومجهود اكتر فبالتالي مامي هتتعب ومش هتقدر تلعب معاك 

دايما حطوا عواقب فعلا تعملوها عشان يكون في مصداقية وكمان تكون مرنة، يعني المطلوب مثلا شاور، واجب، الهدوم في مكانها سواء غسيل او تطبيق إلخ...

ركزوا الحاجه تتعمل مش لازم امتى بالظبط المهم تتعمل

وطبعا ده بيفرق من أم لأم

يارب يكون كلامي ده مفيد ليكوا ، وهستنى اعرف منكوا إنتوا كمان ايه الترتيبات اللي بتهتموا تعملوها مع بداية العام الدراسي وكل سنة واحنا جميعا طيبين

:))

Never take motherhood as an excuse for not living In Style!

~ Israa Amer

All Posts
×

Almost done…

We just sent you an email. Please click the link in the email to confirm your subscription!

OKSubscriptions powered by Strikingly